அறிவியல் நோக்கில் அமைந்த பயணநூல்!
---------------------------------------------------------------------
பி இளங்கோ சுப்பிரமணியன்
நியூட்டன் அறிவியல் மன்றம்
--------------------------------------------------------------
அறிவியல் ஒளி ஏட்டின் ஆசிரியர் நா சு சிதம்பரம்
அவர்கள் எழுதிய " அறிவியலாளரின் அமெரிக்கப்
பயணம்" என்ற நூல் என் கரங்களில் கனக்கிறது.
அந்நூல் குறித்த திறனாய்வு நோக்கில் அமைந்த
அறிமுகமே இக்கட்டுரை.
பயணநூல் (travelogue) என்றதுமே தமிழ் வாசகர்களுக்கு
ஏ கே செட்டியார்தான் நினைவுக்கு வருவார். தமிழ்ப்
பயண நூல்களின் தந்தை காரைக்குடியில் பிறந்த
ஏ கே செட்டியார் எனப்படும் அண்ணாமலை கருப்பன்
செட்டியார்தான் (1911-1983). பல்வேறு நாடுகளுக்கும்
சென்று வந்த ஏ கே செட்டியார் தமது பயண
அனுபவங்களை எழுதி நூல்களாக வெளியிட்டுள்ளார்.
முன்னதாக இவை அவர் நடத்தி வந்த "குமரி மலர்"
என்ற பத்திரிகையில் தொடர் கட்டுரையாக
வெளிவந்தன.
1970களில் எழுத்தாளர் மணியன் ஆனந்த விகடன்
ஏட்டில் பயணக் கட்டுரைகளை எழுதினார். "இதயம்
பேசுகிறது" என்ற தலைப்பில் அமைந்த மணியனின்
பயணக் கட்டுரைகள் ஜனரஞ்சகமாக அமைந்து
சராசரி வாசகர்களுக்கு நிறைவளித்தன.
ஏ கே செட்டியாருக்கும் இதயம் பேசுகிறது மணியனுக்கும்
பின்னர் தமிழில் பயணநூலும் இல்லை; பயண நூல்
எழுத்தாளரும் தென்படவில்லை. இச்சூழலில் நா சு சிதம்பரம்
எழுதிய அமெரிக்கப் பயண நூல் வெளிவந்துள்ளது.
இது இடங்களின் மாண்பைக்கூறும் பயணநூல் அல்ல.
மாறாக இடங்களில் உள்ள அறிவியலின் மாண்பைக்
கூறும் நூல் ஆகும். அறிவியல் பயணநூல் என்ற
வகைமையில் தமிழின் முதன் முதல் அறிவியல்
பயண நூல் நா சு சிதம்பரம் அவர்களின் " அறிவியலாளரின்
அமெரிக்கப் பயணம்" நூலே.
விலை உயர்ந்த பளபளப்பான காகிதத்தில் நூல் அச்சிடப்
பட்டுள்ளது. ஒவ்வொரு பக்கத்திலும் ஒன்றுக்கு மேற்பட்ட
வண்ண நிழற்படங்கள் உள்ளன. கிட்டத்தட்ட 500 நிழற்படங்கள்
இருக்கக் கூடும்.
ஜூன் 2017ல் நா சு சிதம்பரம் அவர்கள் ஒரு மாதப்
பயணமாக அமெரிக்கா சென்றார். அங்கு 17 ஊர்களைச்
சுற்றிப் பார்த்தார். அவற்றின் அறிவியல் முக்கியத்துவத்தைக்
குறித்துக் கொண்டார். தமது பயண அனுபவங்களை
அறிவியல் ஒளி ஏட்டில் தொடர்கட்டுரைகளாக
வெளியிட்டார் .அக்கட்டுரைகளின் தொகுப்பே இந்நூல்.
மேலும் அமெரிக்கா தொடர்பான பலரும் அறிந்திராத
அறிவியல் செய்திகளும் இந்நூலில் அடங்கி உள்ளன.
இந்தியாவில் இருந்து நாம் கொண்டு செல்லும் எந்த ஒரு
எலெக்ட்ரானிக் கருவியும் அமெரிக்காவில் வேலை
செய்வதில்லை. இதன் காரணம் என்ன? இந்தியாவில்
230 வோல்ட் மின்னழுத்தத்தில் (voltage) மின்சாரம் வழங்கப்
படுகிறது. ஆனால் அமெரிக்காவில் 110 வோல்ட்
மின்னழுத்தத்தில் மின்சாரம் வழங்கப் படுகிறது.
இந்தியக் கருவிகள் 230 வோல்ட் மின்னழுத்ததில்
வேலை செய்யுமாறு தயாரிக்கப் பட்டவை. அவற்றின்
மின்னழுத்தத்தை 110 வோல்ட்டுக்குக் குறைத்தால்
அவை வேலை செய்ய ஆரம்பித்து விடும். இதற்கேற்ற
மின்னழுத்த மாற்றிகளை (transformers) வாங்கி நம்
கருவிகளில் பொருத்த வேண்டும். இதுபோன்ற பயனுள்ள
அறிவியல் செய்திகளை நூலில் காணலாம்..
அமெரிக்க விண்வெளி அறிவியலின் திரட்சியாக
நாசா (NASA) விளங்குகிறது. செயற்கைக் கோள்களை
விண்வெளியில் செலுத்துதல் விண்வெளி ஆய்வுகளை
மேற்கொண்டு பூமி குறித்த தரவுகளைச் சேகரித்தல்
உள்ளிட்ட பணிகளை நாசா மேற்கொள்கிறது. இதனால்
இயற்கைப் பேரிடர்களை எதிர்கொண்டு உயிரிழப்புகளைத்
தவிர்ப்பது சாத்தியமாகிறது. நாசாவின் பணிகள்
பூமியில் வாழும் மாந்தர்களின் வாழ்க்கையை
மேம்படுத்தியும் பாதுகாப்பானதாக ஆக்கியும் உள்ளன.
அமெரிக்க அரசு நாசாவுக்காக பெரும்பணம் செலவிடுகிறது.
நடப்பாண்டிற்கான (2024) நாசாவின் பட்ஜெட் 25 பில்லியன்
அமெரிக்க டாலர் ஆகும் (USD 25,000,000,000).இது இந்திய
மதிப்பில் தோராயமாக ரூபாய் இரண்டு லட்சம் கோடி
ஆகும் ( Rs 2,000,000,000,000).
அமெரிக்காவுக்கு நாசா என்பது போல இந்தியாவுக்கு
இஸ்ரோ (ISRO) உள்ளது. கணக்கற்ற செயற்கைக்
கோள்களை இஸ்ரோ விண்ணில் செலுத்தி உள்ளது.
மங்கள்யான், சந்திரயான் என்று கோள்சுற்றிகளை
(orbiters) அனுப்பி ஆய்வுகளை மேற்கொண்டது.
இஸ்ரோவின் பட்ஜெட் என்ன? இந்திய அரசு இஸ்ரோவுக்காக
எவ்வளவு செலவிடுகிறது? 2024-2025ஆம் ஆண்டிற்கான
இஸ்ரோவின் பட்ஜெட் ரூ 13,000 கோடி ஆகும்.
இஸ்ரோவின் ரூ 13,000 கோடியை நாசாவின் ரூ இரண்டு
லட்சம் கோடியுடன் ஒப்பிட்டால், இஸ்ரோவின் பங்கு
நாசாவை விட 15 மடங்கு குறைவு.
அமெரிக்கப் பயணம் என்றாலே, அதுவும் அறிவியல் நோக்கில்
அமைத்த பயணம் என்றாலே, அப்பயணத்தில் நாசா
முக்கியத்துவம் பெறுவது இயற்கையே. எனவேதான்
அமெரிக்கா சென்ற உடனேயே, நூலாசிரியர் சிதம்பரம்
தமது முதல் பயணமாக ஹூஸ்டன் (Houston) நகரில் உள்ள
நாசாவின் ஓர் அலகான ஜான்சன் விண்வெளி மையத்திற்குச்
சென்றார்.
நாசா என்பது ஒரே ஒரு அலகை மட்டும் கொண்ட ஓர் ஒற்றை
அமைப்பு அல்ல. நாசாவின் அலகுகள் (units) அமெரிக்காவின்
19 ஊர்களில் உள்ளன. எடுத்துக் காட்டாக ஏம்ஸ் ஆய்வு மையம்
(Ames Research Centre) கலிபோர்னியா மாநிலத்தில் சிலிகான்
பள்ளத்தாக்கில் அமைந்துள்ளது. கென்னடி விண்வெளி மையம்
(Kennedy Space Centre) புளோரிடாமாநிலத்தில் கடற்கரை
நகரமான மியாமிக்குச் சற்றுத் தொலைவில் அமைந்துள்ளது.
வெவ்வேறு ஊர்களில் அமைந்துள்ள 19 அலகுகளுக்கும்
தலைமை ஏற்று வழிநடத்தும் நாசாவின் தலைமைச் செயலகம்
வாஷிங்டனில் உள்ளது. நாசா என்றால் 19 அலகுகளையும் குறிக்கும்.
டெக்சாஸ் மாநிலத்தில் உள்ள மிகப்பெரிய நகரம்
ஹூஸ்டன். "ஜான்சன் விண்வெளி மையம்" இங்குதான் உள்ளது.
1960களில் அமெரிக்காவின் துணை ஜனாதிபதியாக
இருந்து, ஜான் கென்னடியின் படுகொலைக்குப் பின்னர்
அமெரிக்க ஜனாதிபதியாகப் பொறுப்பேற்றவர் லிண்டன்
பெயின்ஸ் ஜான்சன் (Lyndon Baines Johnson). இவரின்
பெயரில்தான் விண்வெளி மையம் அமைந்துள்ளது.
1620 ஏக்கர் பரப்பளவில் அமைந்த இம்மையத்தில்
100 கட்டிடங்கள் உள்ளன. 110 விண்வெளி வீரர்கள் உட்பட
3200 பேர் இம்மையத்தில் பணியாற்றுகின்றனர். விண்வெளிப்
பயணம் மேற்கொள்ளுவோருக்கு உரிய பயிற்சிகளை
வழங்குவது இம்மையத்தின் பிரதான பணிகளில் ஒன்று.
இம்மையத்தில்தான் விண்வெளி வீரர்களுக்குப் பயிற்சி
அளிக்கும் சமநிலை மிதப்பு பயிற்சியகம் (Neutral Buoyancy centre)
உள்ளது. இதில் 23,000 கனமீட்டர் கொள்ளளவு (Volume)
கொண்ட நீர் நிரம்பிய குளம் உள்ளது. 23,000 கனமீட்டர்
என்பது 8 லட்சத்து 12000 கன அடி (8,12,000 cubic feet)
ஆகும்.
விண்வெளிப் பயணங்களின்போது எடையற்ற நிலை (weightlessness)
மற்றும் தடையற்ற வீழ்ச்சி (freefall) ஆகியவற்றை வீரர்கள்
எதிர்கொள்ள வேண்டும். இதற்கு அவர்களின் உடல்
பழக்கப்பட்ட வேண்டும். மேற்கூறிய குளத்தில் எடையற்ற
நிலை உருவாக்கப் பட்டு வீரர்களைக் குளத்தில் அமிழ்த்தி
பயிற்சி வழங்கப் படுகிறது. இந்தக் குளத்திற்குச் சென்று
நேரில் பார்த்து விளக்கம் பெற்றுள்ளார் நூலாசிரியர்.
ஜான்சன் மையத்தின் இன்னொரு சிறப்பு! இதனுள் ஓர்
அருங்காட்சியகம் உள்ளது. முன்பு விண்ணில்
செலுத்தப்பட்ட ஏவுகணைகள் உள்ளிட்ட 400 பொருட்கள்
காட்சிக்கு வைக்கப் பட்டுள்ளன. 1969ல்
நெயில் ஆர்ம்ஸ்டிராங் நிலவுக்குச் சென்றபோது
அங்கிருந்து கொண்டு வந்த பல்வேறு கற்களும்
பார்வைக்கு வைக்கப் பட்டுள்ளன. இவற்றையெல்லாம்
நூலாசிரியர் பார்வையிட்டுள்ளனர்.
அமெரிக்கா என்றவுடன் நமது கருத்தைக் கவரும் விஷயங்களில்
இன்னொன்று வால்ட் டிஸ்னியின் எப்காட் (EPCOT) மகிழிடம் ஆகும்.
உலகின் மிகப்பெரிய உல்லாசப் போக்கிடமாக இது உள்ளது.
குழந்தைகளுக்கான கார்ட்டூன் படங்களைத் தயாரித்து
வழங்கியவரும் அமெரிக்க அனிமேஷன் தொழிலின்
முன்னோடியுமான வால்ட் டிஸ்னியின் (Walt Disney 1901-1966)
கனவே இந்த எப்காட் மகிழிடம் ஆகும்.
(EPCOT = Experimental Prototype Community of Tomorrow)
வால்ட் டிஸ்னியின் மறைவுக்குப் பின்னர் 1982 அக்டோபரில்
எப்காட் மகிழிடம் உருவாக்கப் பட்டது. இது புளோரிடா
மாநிலத்தில் பே என்ற ஏரியைச் சுற்றி அமைந்துள்ளது.
நூலாசிரியர் நா சு சிதம்பரம் எப்காட் மகிழிடத்தையும்
சுற்றிப் பார்த்துள்ளார்.
அத்துடன் நிற்கவில்லை அவர். அமெரிக்காவரை சென்றுவிட்டு
அருகில் கனடாவில் உள்ள நயாகரா அருவியைப் பார்க்காமல்
திரும்பலாமா? நூலாசிரியர் அதிலும் குறை வைக்கவில்லை.
நயாகரா அருவியை ஹெலிகாப்டரிலும் சுற்றி வந்து
நிறைவு எய்தினார்.
இன்னும் சொல்லிக்கொண்டே போகலாம். விரிவஞ்சி விடுக்கிறேன்.
இவ்வளவு பெரிய நூலுக்கு பொருளடக்கம் இல்லை. தலைப்புகளும்
பக்கங்களும் பொருளடக்கத்தால் இணைக்கப் பட வேண்டும்.
இது அடுத்த பதிப்பில் சீராகும் என்று எதிர்பார்க்கிறேன்.
The proof ot the pudding is in the eating என்றார் ஒரு ஆங்கிலப்
பழமொழி உண்டு. உணவின் ருசி அதைச் சாப்பிடும்போதுதான்
தெரியும் என்று இதற்குப் பொருள். எனவே வாசகர்கள்
நூலை வாங்கிப் படித்து அதன் சுவையை நுகருமாறு
வேண்டுகிறேன். ஒவ்வொரு நூலகத்திலும் இந்நூல்
இருக்குமென்றால் அது வாசகர்களுக்குப் பயன்தரும்.
*********************************************************
பெரும் பயன் அளிக்கும்.
நேரடியாக
.
